甄子丹阿女16歲喇！汪詩詩慶生不忘提呢樣嘢

「宇宙最強」甄子丹同太太汪詩詩嘅囡囡甄濟如（Jasmine）今日生日，踏入16歲嘅佢長得亭亭玉立，同媽咪愈嚟愈似樣。汪詩詩今日晒出多張由細到大同阿女影嘅相，仲以英文寫咗一大段「媽媽的話」祝Jasmine生日快樂，佢指16年前嘅今日，發生咗件最重要同改變咗佢一生嘅事，就係阿女出世喇！汪詩詩自言依家都仲會成日問自己，點解佢咁好彩咁幸福可以做到Jasmine嘅媽媽，又話阿女拯救咗佢同令佢成為更好嘅人。

汪詩詩大讚阿女又靚又有才華，而且好成熟、善良同善解人意，並提醒阿女要努力工作，保持謙虛，喺任何情況下都要保持積極的心態，亦要感恩同尊重他人，以及記住自己嘅根基同文化。最後汪詩詩又希望阿女可以健康啲，例如食多啲水果同着番件褸，睇嚟Jasmine同其他後生女一樣寧願凍都要靚喎！而爸爸甄子丹亦有留言：「Happy birthday nui nui❤️❤️❤️?」此外，名模琦琦同Jessica C.都有留言祝Jasmine生日快樂。