《倚天》賣關子　王晶：唔係邊有宣傳價值！

導演王晶出席新片《肥龍過江》首映禮，戲中有大量動作場面的他直言拍攝時相當辛苦：「去到東京好凍，氣溫得零下幾度，我要手按地，發覺好似按咗落冰一樣！」記者打趣問他身手是否拍得住男主角甄子丹，王晶即謂：「梗係佢勁啲。」

談到該片選擇農曆年檔上映，他謂：「有乜所謂，配合到咪上囉，香港係全球第一個上映嘅地方，反而內地會喺情人節先上映。」他表示「該做嘅都已做晒」，至於有網民發起罷睇，王晶坦言：「政治嘅嘢從來都唔理，如果唔睇係另外一種選擇。」他希望今次賀歲檔能夠百花齊放。

至於女主角周勵淇因為懷孕而缺席，王晶表示對方事前有協助宣傳，他又爆毛舜筠全家出埠「環遊世界」，所以亦未能亮相首映。當被問到新片《倚天屠龍記》的籌備，王晶則大賣關子：「遲啲先講啦，都未開拍，如果唔係邊有宣傳價值？」