放假去日本鬆一鬆 王梓軒越洋同大家拜早年

20200122
東網電視
更多新聞短片
做得咁辛苦,梗係要鬆一鬆啦。
今日年廿八,身在日本福崗嘅王梓軒越洋同大家拜個早年:「新年快樂!身體健康!鼠年得意!全家都開開心心!遇到任何疑難都可以好似隻老鼠仔咁靈活處理。」三日後就大年初一,雖然梓軒鬼仔性格,但每年大年初一都要到爺爺、婆婆屋企團拜,故他定要在新年前趕返港。
早幾日孖埋同事一齊去日本度假,先後去咗長崎及福崗,梓軒話:「長崎嘅豪斯登堡堪稱日本小荷蘭,好幾年前,我同兄弟幫一齊去荷蘭拍聖誕節目,今次嚟度呢度有好多回憶,嗰度真係好靚,而我哋住咗間主題酒店,酒店出面就泊咗海賊王隻船,雖然我唔係海賊王超級fans,不過喺正附近當然要去打卡啦!話明係日本小荷蘭,所以佢哋都有自家製嘅荷蘭芝士,我哋買咗大量嘅芝士、醬汁同蛋糕,食咗好多餐荷蘭style、法國style同英國菜,啲意粉同pizza好好食。」
梓軒跟同事們亦登船暢遊著名嘅九十九島:「呢度有九十九個島嶼,我企喺珍珠皇后號遊覽船上,沿途睇景,而九十九島亦有一個好出名嘅水族館,有好多海洋生物,海龜、海豚,仲有啲二億年前已經有嘅生物後裔,不過我覺得最得意就係可以自己夾珍珠送畀媽媽,我咁大個仔都係第一次咁樣喺貝殼上取珍珠……其實做完《利瑪竇》之後,我哋先飛東京做嘢,之後再飛長崎同福崗玩,做完嘢玩梗係開心啦!不過錯過咗《多功能老婆》嘅慶功宴。」