發大財！江若琳Oscar「補水」等開枱

藝人江若琳與老公「生煎包王」蕭潤邦（Oscar），上月才慶祝結婚一周年，不時夫妻檔落手落腳於餐廳坐鎮。日前二人趁農曆新年將至，睇舖期間抽空相約女友人於銅鑼灣逛街，買定大堆賀年物品。

當日下午5時許，素顏上陣、戴鴨舌帽的江若琳，與老公及女友人三人行，Oscar率先前往買賭具，掃了一大碌麻雀紙才與老婆會合，但江若琳卻只顧與友人傾偈，邊行邊講唔停，冷落老公，搞到Oscar愈行愈㷫要除外套。

同步扁嘴有默契

當發現記者在場，二人一臉愕然，更極為合拍地齊齊扁嘴，定過神後才「變臉」向鏡頭笑騎騎，然後到銀行撳錢上定銀彈，看來是預備開枱發新年財！「補水」後，手持大碌麻雀紙的Oscar體貼地護駕老婆過馬路，期間不時咬耳仔，手拖手到附近商場繼續入貨。