徐綺雯親繪大紅燈籠高高掛　寓港人鴻運當頭

從小細愛畫畫的名媛徐綺雯（Candy)親自畫了一幅色彩繽紛的油畫過新年，她說：「細個已好鍾意畫畫，啲畫成日都有被貼堂，我鍾意啲畫有好多顏色，平時喺屋企得閒就會畫。（之前有幅畫被拍賣？）係，有次喺上海慈善拍賣我幅畫拍到5萬元，我朋友已再邀請今年又攞畫出嚟拍賣，希望今年拍到多啲錢。」Candy畫畫可令到心境平靜，說：「我鍾意畫關於愛情、有愛心、動物嘅嘢，今次幅畫係賀新年，畫咗大紅燈籠高高掛，代表鴻運當頭，有兩隻雀仔，好事成雙，有情人終成眷屬。」

而每逢新年Candy均會回澳門與家人過，她說：「澳門比香港熱鬧，有啲放煙花、燒炮仗，好有氣氛。（有冇試過發生危險？）試過，有次點咗煙花但冇爆出嚟，跟住行過去睇時突然爆咗，嗰刻都嚇親，好彩冇事，之後再點唔爆就唔敢行過去。」

場地：Aura Art

服裝：The Sparkle Collection by germanpool