姚子羚感情隨緣 目標做包租婆

20200131
東網電視
更多新聞短片
姚子羚對感情事隨緣!
姚子羚在無綫劇《黃金有罪》中扮演一位「等愛的女人」,愛上張兆輝不能自拔,結果患上抑鬱甚至自殺,最終對方仍沒有選擇她。她形容角色變化大,演來心力交瘁,幸而與蕭正楠的對手戲比較輕鬆,可作出平衡。
認真又可搞笑
首次與張兆輝合作,子羚讚不絕口說「好正」:「佢好照顧後輩,我生日佢竟然買蛋糕,真係好感動。同佢去泰國外景,輝嫂不時買嘢食買埋我嗰份。唔好睇輝哥工作認真,私底下可以好搞笑。」她很羨慕對方結婚多年夫婦恩愛:「佢兩夫妻互補不足,輝哥好錫輝嫂,輝嫂又好緊張老公嘅儀容。(幾時輪到你?)放心,我會拉埋定欣一齊(尋覓另一半),我冇放棄,但隨緣,感情事冇得諗咁多。」
賺到錢做善事
《黃》劇以股票市場為背景,子羚原來切切實實是「黃金有罪」的信徒:「從來唔買股票嘅,我只聽媽咪講投資磚頭,老來點都要有個竇。啱啱開始供樓,發覺真係幾貴,依家有錢就擺晒落去,希望快啲供完。如果搞掂呢層嘅話,會計劃買多個細單位收租。」幸而子羚投資的首飾生意漸上軌道,利潤略有成績:「我同拍檔有個心願,從我哋賺得嘅錢中,撥啲出嚟做善事,例如捐畀動物組織或環保團體,依家已經做緊,日後可以嘅話,希望成立基金幫助有需要嘅人。」
農曆新年前子羚難得小休,但她渴望有個悠長假期,完成個人計劃:「起碼放半年假去讀書增值,同埋之前同啲好姊妹去澳洲,發現我哋可以以義工身份,喺當地嘅袋鼠收容中心工作,不過起碼要逗留兩、三個月先得。」