出走澳洲避疫情　張達倫諗緊移民

藝人張達倫一家三口現時於澳洲悉尼旅行，享受家庭樂，面對陽光與海灘，心情都特別舒暢。他坦言已於當地多日，現時香港有武漢肺炎確診個案，當然希望留得幾耐得幾耐。現時不少港人喊着要移民，問他會否考慮選擇澳洲為移民之地？他謂：「我真係有諗呀！其實係因為大女今年開始喺澳洲讀書，呢個Trip都係陪佢過嚟開學，咁我哋都會順道睇吓啲地方，可能太太同囝囝會過嚟睇住阿女，到時我自己就兩邊走都未定。」

達倫都與太太、囝囝碩碩去了不少的地方遊玩，亦揸車個多小時去餵塘鵝，更去澳洲動物園親親袋鼠，張達倫笑言給碩碩嚇親，他謂：「佢一啲都唔驚啲袋鼠，仲衝埋去摸佢哋，我都驚啲袋鼠畀佢嚇親打佢，但原來唔會嘅，啲袋鼠好Friendly。」期間，碩碩見到一架大車，不知幾興奮，更冧爆爸爸表示駕車載他返工，令達倫哭笑不得。澳洲現時都有少量的肺炎確診個案，但那邊的小朋友都周圍玩、碌地沙，亦因為有不少內地及香港人掃口罩，故當地都有缺貨的情況，只有少量的消毒洗手液出售。