疫症爆發壓力大 余香凝成日覺得喉嚨痛

2020年02月13日 22:16
東網電視
更多新聞短片
余香凝忙於為家人撲口罩。
藝人余香凝(Jennifer)今現身香港開電視,接受苑瓊丹主持的節目「開工大吉77」訪問,Jennifer笑指苑仔轉數快,笑言自己招架不住:「今日見佢扮師傅,都嚇咗一跳!佢把口好勁,加上我又轉數慢,最怕係令到個節目唔好睇!其實我都把握機會同對方請教做戲心態,有前輩教路會易行啲!」
Jennifer話呢排疫情肆虐,自己忙於宣傳新歌外,亦要為家人撲口罩:「我周圍問朋友邊度有口罩,邊個去旅行幫手買畀我,咁就未去到絕路要排隊買,不過我心理上有壓力,成日覺得自己有啲咳、喉嚨痛,呢排都要宣傳新歌,惟有唔使開工就閉關,慳番個口罩。朋友笑我搵命博做宣傳,其實係想帶正能量畀人,希望聽完我呢首輕快嘅歌,大家都開心啲!」
苑仔就大讚余香凝乖巧,認為對方前途無可限量:「我見到佢諗番起我以前,覺得佢好似我,如果佢矮番少少,佢成個仕途就會好似我架啦!哈哈!其實呢行要好忍同狠,冇工開要忍得,有工開就狠!」
因為新冠肺炎情況,苑仔工作都大受影響:「本來要去台灣拍戲,本來傾緊幾時去隔離等開工,都未傾完已經禁止入境。咁算啦,依家咪休息一下,盡量保持開心,同朋友見面第一句就問有冇口罩,慢慢買番多少。」