隔住個Mon都聞到香味　JW做女煮人

新冠肺炎疫情持續，有唔少藝人乖乖留喺屋企「自我隔離」，更趁呢個非常時期培養興趣，有「地獄廚神」稱號的JW（王灝兒）就嚟個大反擊做「廚娘」！見佢連日來喺IG Story晒廚藝，有圖有真相，證明冇假手他人，佢煮起嘢嚟有板有眼，實行「轉行」改揸鍋鏟都掂！

一身Sporty Look嘅「廚娘」JW第一味係肉醬意粉，上碟之後再加芝士，真係隔住個Mon都聞到香味；第二味美食就係壽喜燒，以煎餃完美作結；第三味嘅泡菜炒飯就唔記得影「寫真」，煮勻西、日、韓佳餚，認真識食！興趣係好易感染身邊嘅人，當然最先「中招」就係另一半，男友Tarzan都有陪玩煮飯仔，幫手煲湯亦有整JW最愛嘅香蕉朱古力酥皮班戟，喺情人節仲額外加蛋同雪糕，冧到JW鬼死咁Sweet！