口臭網友寸炒作成癮　高以翔女友選擇咁回應

台灣藝人高以翔去年11月拍攝真人騷《追我吧》時不幸猝逝，其女友Bella痛定思痛逐漸走出陰霾，雖然仍未忘記愛人，不過佢都積極生活，時不時晒出生活照證明自己一個人都過得好好，久不久又會上載同高以翔嘅舊照懷念，都幾洋蔥㗎！不過有啲口臭網民就出嚟留下惡劣留言，走去Bella社交網留下「火葬場出道」等充滿惡意嘅評論，真係夠晒黑心。

Bella喺1月初上載3張風景照，並有感而發地寫下：「用心呼吸，感受當下」等字眼，卻引來網民圍剿佢「冒充」高以翔女友、發文係刻意炒作，有粉絲睇唔過眼就替佢出面反擊，但本人就未對此回應。

不過有網民就仔細觀察能發現，Bella喺本月8日上載靚相時，似乎已悄悄關閉留言功能，尋日情人節佢甫出一張坐喺副駕駛座照，旁邊揸車位男士就似係高以翔，佢簡單寫下：「2.14」並附上1朵玫瑰花，留言功能仍是關閉狀態，似係唔想再引起任何紛爭，用最低調嘅方式回應網上欺凌。