陳意嵐接受到SM：思想應該開放啲

藝人張建聲（Justin）和陳意嵐（Tarah）前晚於葵涌開live，為ViuTV播映的《向西聞記》單元《咖喱雞》造勢，Justin好友喇英更特別為兩人炮製自家咖喱雞及手工意粉。戲中Tarah因為失戀醉酒而與鹹濕仔同事Justin發生一夜情，但她將甩拖情緒發洩在對方身上，脫掉他的皮帶係咁鞭，當日Tarah拍時埋牙堅打鞭鞭有力，打到Justin成個背脊又紅又腫，Justin憶述當時導演冇嗌cut，又問Tarah打他有否暗爽，她即說：「冇喎，咁知你痛吖嘛，我唔明啲人點樣搵到樂趣。」

兩位演員前晚一齊重看《咖喱雞》，播到Tarah錫冇着衫的Justin背脊時，她突然問：「你當時有抹乾淨個人㗎可？」Justin極衰回應：「我係拍戲夜班接早班嚟，仲拍完場打戲。」

開live期間，談到SM話題，Tarah笑言自己身形高大頂得住，更說：「我覺得思想應該開放啲，可能他朝有一日我遇到個男朋友喜歡可以試吓，唔知㗎，要遇到個對手先激發到你潛能。」