宣萱戴布口罩 陳豪Man爆唔削員工福利

2020年02月24日 20:00
東網電視
更多新聞短片
真係要做好衞生措施!
藝人陳豪、宣萱、林穎彤、張彥博、黃建東及趙永洪現身為無綫新劇《陀槍師姐2020》(暫名)開工。兩年未有新作的陳豪,笑言手頭上有三部劇排隊出街,再講到新冠肺炎肆虐,於人來人往、繁忙街道上取景可會擔心?他坦言都有:「做演員冇辦法戴口罩。(放工返屋企啲仔女會撲埋你度?)會㗎!但叫佢哋唔好,入門前會噴消毒、沖埋涼先同佢哋玩。」身旁宣萱笑話對狗狗唔Work:「點叫佢哋都會撲上嚟,惟有避開佢哋去洗手先。」
忍住唔捽眼
問到拍劇時可會減少接觸?他們表示都好難:「取景位置都好Open,都好難防,劇組都會揀啲冇確診個案發生過嘅地方拍攝,盡量小心,因為只要有一個有事,大家都會中,會帶定搓手液旁身,做好基本衞生措施。」若有親熱戲份會借位拍?宣萱表示暫時未有:「就算有都唔拍住,仲唔好捽眼同埋面,但愈講愈痕。」續指其實大家不用過份驚慌:「我係好隨緣,要中嘅話戴口罩可能都會中,覺得呢個疫情喺香港都算控制得好好,自己出街都係用布口罩,用完就洗、再消毒,啲外科口罩就留嚟緊急嘅時候用。(撲唔到口罩先用布口罩?)唔係,但外科口罩又係咪真係防晒又真係唔知,朋友有問我買唔買,係我唔買住留番畀啲有需要嘅人,就好似廁紙、漂白水呢啲夠就OK,唔好自亂陣腳,唔拍戲就少出街。」
與員工共渡時艱
談及市道受疫情影響轉差,陳豪直言咖啡店生意有下滑,更用「傷」來形容,不過即自我安慰:「跌幅大,但都OK嘅,有同業主傾減租,希望傾得成。(有咩自求方法?)覺得自己嗰防守性都幾強,有信心可以過到呢個難關,同員工互相幫助。」有要求員工放無薪假?陳豪Man爆指不會削減員工任何福利:「舖頭已經唔多人,得3、4個,如果削減咗,遲啲市道好番,重新上軌好難,明白員工開心先會付出工作。」宣萱大讚對方好老闆,又指屋企家傭即使放假都寧願留在家中,自己都不介意。
陳豪笑指三個小朋友現時停學,每日都自我娛樂:「我好Lucky,佢哋唔會扭出街,好彩有伴可以玩到癲,Aimee(陳茵媺)又同佢哋焗吓嘢,我哋又教吓佢哋做功課,忙咗、責任又大咗。」