古裝劇濃眉造型出事　吳建豪剃眉還擊？

台灣藝人吳建豪向來憑迷人單眼皮成功俘虜唔少粉絲，最近與內地藝人唐嫣合作古裝劇《錦繡未央》，當中吳建豪嘅濃眉造型非常搶鏡，加上高辮子頭令其單眼皮更鳳眼，有網友笑言佢係咪得罪化妝師，仲封佢為「史上最醜的古裝劇男二」！

唔知係咪向網民還擊，吳建豪喺社交網上載咗段自拍短片，片初佢用手遮住半塊面，之後移開見到兩條眉竟然消失，唔少粉絲被吳建豪呢個冇眉造型嚇親，仲話似足蛇精男，男神形象崩壞！不過，之後吳建豪再上載做facial嘅短片，見兩條眉仲健在，相信「冇眉男」係特效啫，唔知前妻石貞善有冇被佢嚇親呢？