拍緊笑片？安志杰射擊場練打靶跌匣出醜

藝人安志杰拍過唔少動作戲出名身手好，每次拍拳腳對打都會親身落場，一身好功夫令人讚賞。近期全球受肺炎肆虐，演藝工作大受打擊，喺呢段比較清閒嘅時間佢都冇偷懶，喺美國接受動作電影其中一種重要技能訓練，就係射擊！咪睇佢打得身手咁好，點知換彈匣嘅時候連番失手，最後連彈匣都跌埋落地真係笑爆嘴！

安志杰喺IG甫咗條片，見佢連開8槍打四個近靶，再換彈匣打2槍遠靶，成套動作一氣呵成都係用咗7.25秒認真厲害！不過喺微博見到有另外一條片，佢都係做埋同一套動作，但係換彈匣時出晒事，揸住隻新匣快手插落槍到時，佢大力得嚟又唔啱位，搞到隻匣飛咗出嚟，不過練開功夫嘅佢反應堅係快，隻匣跌到落條腰位佢都可以一手擸實，跟手再插入槍，正當佢擺好姿勢再開槍時，原來佢未插實，個匣就喺佢開槍時自然墜落地，佢惟有係腰間抆第二隻匣完成呢套動作，睇嚟佢都要多啲操練，唔係拍戲時就會成日NG！