拍紧笑片？安志杰射击场练打靶跌匣出丑

艺人安志杰拍过唔少动作戏出名身手好，每次拍拳脚对打都会亲身落场，一身好功夫令人赞赏。近期全球受肺炎肆虐，演艺工作大受打击，喺呢段比较清闲嘅时间佢都冇偷懒，喺美国接受动作电影其中一种重要技能训练，就系射击！咪睇佢打得身手咁好，点知换弹匣嘅时候连番失手，最后连弹匣都跌埋落地真系笑爆嘴！

安志杰喺IG甫咗条片，见佢连开8枪打四个近靶，再换弹匣打2枪远靶，成套动作一气呵成都系用咗7.25秒认真厉害！不过喺微博见到有另外一条片，佢都系做埋同一套动作，但系换弹匣时出晒事，揸住只新匣快手插落枪到时，佢大力得嚟又唔啱位，搞到只匣飞咗出嚟，不过练开功夫嘅佢反应坚系快，只匣跌到落条腰位佢都可以一手擸实，跟手再插入枪，正当佢摆好姿势再开枪时，原来佢未插实，个匣就喺佢开枪时自然坠落地，佢惟有系腰间抆第二只匣完成呢套动作，睇嚟佢都要多啲操练，唔系拍戏时就会成日NG！