【甫片失手】張栢芝太大意　細仔靚樣曝光

女星張栢芝近日帶同三個仔仔與親友到泰國旅行避「炎」，連日來佢喺社交網上載咗唔少靚相，其中佢哋去到泳池玩水，見大仔Lucas全程照顧住細細佬「小王子」Marcus，又抱住Marcus教佢踢水，兩兄弟非常溫馨，就連栢芝都忍唔住表示：「好感動，當媽媽看到這畫面真的很足夠。」而二仔Quintus就掛住同其他小朋友玩水，仲忘形到着上細佬Marcus嘅潛水衣，逼爆衫都一於少理繼續玩，認真搞笑。

此外，佢哋又去到商場玩機動遊戲，戴上口罩嘅栢芝抱住Marcus玩電動車，而佢拍照後亦不忘加上emoji為仔仔遮樣，相當貼心。不過另一段片中，見有一位小朋友側面出鏡，身形同Marcus相近，加上栢芝讚佢「乖仔」，唔知Marcus嘅「廬山真面目」係咪終於曝光呢？