《法證》見證成長　鄭俊弘有份唱插曲好開心

歌手鄭俊弘（Fred）不單有份演出熱播劇《法證先鋒IV》，更為劇集唱出插曲《不要流淚》，早前他為新歌拍攝MV，Fred說：「《法證先鋒》呢部劇見證咗我嘅成長，今次再有份主演，仲可以為劇集唱歌，感覺好奇妙好開心。」

今次這首歌是一個新嘗試，編曲方面有一種好歐陸嘅感覺，Fred笑說：「作曲人張家誠話係一首充滿法國手風琴色彩嘅歌曲，我完全feel到嗰種好chill享受生活嘅寫意感覺，導演仲特登搵咗架古董車做道具，諗住我可以揸住周圍遊車河，可惜我唔識揸棍波車。」

MV故事講述男人之間的兄弟情，大家會圍埋一齊講車玩音樂、去酒吧happy hour，令他回想起同幾個好朋友夾band的日子，他說：「男人之間都會有小磨擦，但係兄弟唔會有隔夜仇，大家好簡單飲番杯，拍拍心口心照就無事啦。」