結婚冇耐！林志玲慘變墮胎代言人

藝人知名度高，往往都會獲得廣告商垂青，擔任唔同類型代言人，「台灣第一名模」林志玲中港台知名度咁高，擔任「6分鐘護一生」子宮頸抹片檢查代言人多年嘅佢，竟然有內地婦科診療中心，將佢代言嘅相植入喺墮胎廣告，仲標明2分鐘無痛流產手術特價400蚊人民幣（約456港元），結婚冇耐嘅林志玲突然變成「墮胎代言人」？真係嚇得到一班網友個心離一離呀！

林志玲隨即透過公司表示，對方未經佢同意就將佢張相刊登，所以現時會採取法律行動，追究到底。