明星豪宅逐個數!無綫妹仔越級住九龍塘大屋

20200313
東網電視
更多新聞短片
好羨慕呀!
生活喺香港樓價咁貴嘅地方,住大屋可能只係一個夢想!但明星就唔同喇,年收入咁多,一間大屋對佢哋嚟講只係濕濕碎,今期帶大家去睇吓明星們嘅豪宅,有「野狼disco」陳偉霆、四子女之父嘅林盛斌(Bob)、台灣天后張惠妹、人稱Benz雄嘅許紹雄、黑仔姜皓文、馬來西亞鋼琴女神李元玲、花木蘭劉亦菲,但最估唔到係佢,無綫御用妹仔張韋怡,竟然住喺九龍塘逾8000呎獨立大屋!
無綫御用妹仔張韋怡原來係隱形闊太
張韋怡(Gogo)呢個名對大家或者好陌生,但只要你見到佢個樣,絕對認到佢係邊個,佢曾經參演過百套劇集,角色通常係宮女、妓女、護士等閒角,最令人印象深刻係有《金宵大廈》演春麗鳳姐,小小宮女但卻住喺九龍塘逾8000呎獨立大屋!佢早前係社交網仲意外曝光毫宅內有升降機,點解宮女好似王后住得咁豪?因為佢有個地王老公,據聞佢老公擁有300幅地皮及經營鐘錶生意,一家生活無憂,而Gogo嘅社交網經常分享去旅行嘅靚相,仲有唔少三點式大晒好身材添!
陳偉霆豪宅客廳同狗狗追逐
陳偉霆(William)早前喺大陸電視台唱出神曲《野狼Disco》,令佢一度成為網民熱話,歌詞入面有句「我想要帶你回家...讓你盡情搖擺」,事實上William嘅家真係大到可以盡情搖擺,因為新冠肺炎好多工作都叫停,William就多咗時間陪屋企人,佢都將照片上載到社交網同大家分享,無意中將佢嘅豪宅曝光,客廳大到可以同狗狗玩追逐遊戲,喺巨型梳化旁邊左穿右插,而牆上嘅投影屏幕最少都過百吋大,廳中有樓梯,間屋起碼有兩層,而且有落地玻璃門窗,坐擁無敵靚海景,唔好話搖擺,直程擺幾圍都得呀!
四子女之父林盛斌為仔女愈住愈大
藝人林盛斌(Bob)一向勤力工作,為嘅係畀老婆,4個仔女仲有2個工人姐姐一個舒適嘅安樂窩,本身住加多利山3000呎大屋嘅佢,早前被迫遷,全家搬到九龍塘三層獨立屋,阿Bob為仔女準備咗超大遊戲室,仲有學習室,枱櫈都係照學校入面咁設計,務求令仔女更投入學習,早前阿Bob更係豪宅入面為黃翠如慶生,有近20名老友出席,眾人喺廳中合照時,仍然大把空位,有份出席嘅C君就笑言Bob屋企大過地球!
張惠妹台北四層豪宅環抱群山
貴為台灣天后,咁可以住得差,張惠妹(阿妹)嘅億元豪宅日前曝光,呢憧四層高嘅分墅被群山環抱,最重要係私隱度夠高,位於台北最貴的別墅地段,9年前價格就已達每平方85萬元(新台幣,下同),每座別墅由2.2億至4.7億之間,阿妹喺陽台上鋪滿草坪同種滿各式各樣的闊葉植物,好似置身大自然一樣,而入面裝修更係極盡豪華,1、2樓設有會議室、會客室、房間和飯廳,3、4樓係阿妹私人空間,而裝修用料都係頂級貨。
許紹雄星洲4,000呎豪宅電視台都去拍
許紹雄人稱Benz雄,皆因於70年代時,佢係喺麗的電視第一個駕駛奔馳(Mercedes-Benz)上班嘅藝員,所以佢被人稱為Benz雄,另外佢早前亦透露自己嘅顯赫家勢,佢係魯迅個姪,而太公係慈禧的乾兒子,佢同名人許晉亨都有親屬關係。有番咁上下家勢,對住梗係要講究,佢喺新加坡價值港幣2千3百萬嘅4,000呎豪宅就吸引咗當地電視台去採訪,Benz雄呢間三層半嘅獨立屋,有6間房同附有泳池!Benz雄仲準備申請成為新加坡公民,計劃將重心移到新加坡,打算投資餐飲生意,例如珍珠奶茶。
姜皓文8位數購馬國5000呎別墅
姜皓文(黑仔)出名係愛妻號,佢早前就以八位數字於馬來西亞購入5,000呎物業,作為送給太太殷寧的生日禮物,佢成日趁住工作空檔就會飛到當地度假,新屋有個大泳池,面向海同山,環境優美,黑仔索性整張餐枱於池旁,睇住美景歎美食,認真疏乎!
李元玲豪宅設無邊際泳池
馬來西亞鋼琴女神李元玲一副火辣身材勁吸睛,其實佢背後真係付出唔少汗水,佢間萬呎豪宅,就有無邊際泳池及超大健身室,方便佢日操夜操,仲有就係係泳池取景拍下水着性感照,真係足不出戶就能滿足晒所有願望。而貴為鋼琴女神嘅佢,家中就有一座三角大鋼琴、吧枱及8人大飯枱,屋內亦設有升降機,逾一萬呎別墅據知售價為馬來西幣2200萬,即約港幣4100萬,平均呎價將是4千元,喺香港真係買唔到。
劉亦菲18萬呎大宅園用嚟養貓
內地女星劉亦菲擔正迪士尼真人版《花木蘭》女主角,最近該電影正式喺美國首映,擁有十八般武藝嘅劉亦菲,生活喺家境富裕嘅家庭,佢亦被培養成為天之驕女。而佢喺北京市順義區的豪宅市值億元,面積大得誇張,達18萬呎,即約有四個足球場大,入面各房間具有不同功能,包括鋼琴室、舞蹈室、放映室及車房等,連舊愛宋承憲家訪時,亦被超級大宅園嚇了一跳!但身為貓癡的劉亦菲只視豪宅為「流浪貓」收容所,聽聞最高峰時曾有50隻之多,目前保守估計也有30隻貓咪。