習慣單身!湯洛雯寧願柏拉圖式戀愛

2020年03月17日 00:00
東網電視
更多新聞短片
湯洛雯鍾意神交多啲!
自與羅天宇分手後,湯洛雯(靚湯)曾先後跟劉愷威及鄭子邦傳緋聞,可惜真命天子還未出現,身邊好友都替她着緊,不時做媒,令她大感尷尬,她說:「我心態係隨緣,覺得撞到就撞,我唔鍾意咁樣(介紹),造就機會都要對方啱先得,都有同朋友提議,一係畀我電話佢,等大家傾吓偈先,了解下大家性格先至約出街,我又唔想出街住,但又唔可以係講電話聽把聲,只限短訊溝通,哈哈!」
習慣單身
靚湯又自爆曾有男士欲透過朋友認識她,但以短訊交流後發現不適合:「佢好似唔係好理解我嘅工作,好想約出街見面,但我又唔想!朋友話我麻煩,因為我話要傾兩、三個月了解吓先,佢哋話依家啲男仔點會咁做。」她承認甩拖頭一年的確想拍拖,但其後想法有變:「習慣咗單身,所有嘢都係自己為先,好舒服。拍拖之後,每日擘大眼就會諗起對方,去邊都要諗佢先,依家賺吓錢先,又唔係咁急,不過將來拍拖都未必公開,感情我鍾意低調,但如果問起唔會否認嘅。」
拍《法證IV》虛脫
談及新劇《法證先鋒IV》,靚湯直言是入行以來最大壓力的一次:「冇試過咁短時間準備,同埋場場戲都有我份。小青姐(梅小青)嘅劇本一個字都唔改得,所以好似大考咁,要不停背書,如是者連續咗幾星期!」首度演記者的她,笑指一度以為自己是戰地記者:「有場戲為咗欄截的士,我要趴上車頭蓋,期間司機將我揈來揈去。場戲有武指同替身,但基本上都係自己上陣,其實我又唔係好驚,好似玩機動遊戲咁,過足癮!」問到最深刻的一場戲,她說:「有場喊戲拍咗幾日,因為天雨關係,拍到肝腸寸斷,喊足兩個鐘之後收工,第二日又嚟過。套劇所有嘢加埋令我好虛脫,但拍完又覺得升咗班,自信多咗!」