阿Sa關智斌漏夜執包袱撤離 倒瀉籮蟹

2020年03月17日 10:10
東網電視
更多新聞短片
佢哋未返香港住,係要趕去下一個拍攝地。
現身在吉隆坡拍攝網劇嘅藝人蔡卓妍(阿Sa)同關智斌(Kenny)今日就忽然上載「走佬」相,表示接到劇組通知要即時轉去下一個拍攝地,點知就搞到倒瀉籮蟹。
當中阿Sa就自爆用咗1個鐘時間沖涼同執行李,等佢唔會阻礙團隊Schedule,但因為趕住漏夜走,大家都冇好好咁摺靚靚啲衫就入篋,搞到個個行李都「多咗」一倍,眾人去到目的地已經係凌晨4點半,阿Sa仲因為慣咗早班而搞到瞓唔到!而佢都做足個人衞生,話呢排洗手嘅次數係佢人生之冠,洗到隻手有少少甩皮:「不過洗手真係好緊要,健康緊要過靚,大家都唔好鬆懈💪🏻,保護好自己就是保護別人,加油🥰」
而本身諗住可以收工鬆一鬆嘅Kenny,就話自己已經開埋《李屍朝鮮》出嚟煲劇,仲悠閑地食晚餐,點知一轉頭就收到通知要匆忙收拾行裝,連佢自己都笑言係「午夜狂斌」呀!今次咁趕,因為吉隆坡疫情日趨嚴重,為安全起見,所以劇組提早轉到下一個拍攝埸地。
至於同劇嘅何珮瑜同陳家樂一樣喺馬來西亞急「逃亡」,何珮瑜上載同陳家樂及工作人員在車廂嘅自拍合照,指晚飯期間突然收到通知,趕返酒店收拾行李離開,而陳家樂則留言指:「前路茫茫」。
陳家樂受訪時話:「突然收到通知,話要即刻走,都冇時間睇番啲新聞,話唔走就走唔到,用咗一個鐘執行李加食嘢,因為車程要四個幾鐘,食啲嘢就上車。啱啱做完GYM,諗住返去休息吓就收到呢個消息。尋日6點鐘先到酒店,依家唔都唔知發生咩事!」