同李施嬅談情硬咗！海俊傑親完熱鬆晒

歌手海俊傑（海仔）與李施嬅因合作劇集《法證先鋒IV》結緣，之後再推出合唱歌《二次緣》。他透露在《法》中飾演聲紋專家，但笑言今次難度在於要與施嬅談情：「初頭拍嗰陣投入唔到角色，今次差唔多去到ending先放鬆同施嬅談情。（可能好耐冇拍劇？）係好耐冇拍拖，同老婆唔使拍拖㗎嘛，好耐冇對住第二個女人，所以有啲緊張。」他謂近年在內地拍劇都是英雄片，演很酷的角色，笑言很久沒對住咁靚的女生，當堂硬晒：「塊面硬晒，表情郁唔到，施嬅同導演成日叫我放鬆啲，搞到我好似唔識做戲咁，好彩後尾剪出嚟都睇唔出嘅。」

海仔又謂最尾與施嬅有場親熱戲，笑言是自己最放鬆的一場戲，問到可是激吻？他表示：「電視尺度都唔會激得去邊，喺梳化做嗰場戲，我喺後面攬住佢，有啲錫咁，幾浪漫。」問到可有向老婆備案？他即大爆老婆反而很支持兩人「拍拖」，不會呷醋，亦沒有監場，對他很放心。提到今次相隔近20年再拍無綫劇，他笑言不記得原來是咁攰：「可能當年年輕，唔覺得攰，依家啱啱返嚟拍，時間係長啲，但捱吓捱吓又過，又頂到，老婆都會煮好多好嘢畀我食，又幫我化妝，等我可以休息多啲。」

至於提到與施嬅合唱歌，海仔讚首次出歌的對方歌喉好，而新歌亦盡量配合劇中兩人的「二次緣」。他又提到MV故事複雜，講述施嬅失憶，忘記兩人拍拖做過的所有事，包括一起畫畫等，拍攝時他更感動到喊：「到最尾嗰幕施嬅有句對白，佢嬲我點解呃佢，原來咁多畫我都識畫，我話其實唔想呃佢，係想提醒佢，只係冇機會講，佢最尾一句對白就話：『你唔好再迫我啦，我其實對你一啲印象都冇』，當堂嗰下真係好心酸，拍時佢都即刻叫我唔好喊住。」他亦透露之後會與施嬅推出歌曲國語版，希望疫情過後可以到內地宣傳，能在現場與施嬅合唱，並打算之後在網上開live合唱。

服裝：DEGAIA