何婉盈20年後再出新歌

藝人何婉盈到電台接受好友倪詩蓓訪問，甫受訪便公布剛加盟新唱片公司好消息，更透露快將推出新歌：「成20年都冇再錄過歌，但因為疫情都延遲咗錄音。（有冇練畀阿女聽？）佢得13歲、中文又比較弱，我要將之前出嘅舊歌，一句句解釋佢聽，但新歌會好啲，因為最近唱多咗，依家佢都開始識聽中文歌。」

何婉盈再爆女兒現身處加拿大，要下星期才回港團聚：「之前香港爆疫情，就送咗佢去加拿大同我媽媽、哥哥住，去嗰邊滑雪，依家嗰邊爆疫情就想佢返嚟，佢去咗成個月，係我哋分開得最耐時間。」續指已做好一切防疫措施，只是等候女女返港，又謂是次經歷大時代挑戰：「有睇晒啲家居隔離指引，阿女都知佢返到嚟大部分時間都要喺房，又執好個廁所淨係畀佢用，食飯都諗住Facetime。（叫佢搭飛機多注意？）之前同佢去澳洲，都有示範點去廁所、個座位點消毒，咁佢好瞓得嘅，瞓醒就到，有叫哥哥買定啲防疫物資畀佢上機。（要捱貴機票？）又唔使撲！我係換機票，一早安排咗佢下星期返嚟，依家最難買係中童口罩！」媽媽、哥哥會回港？她表示不會：「其實佢哋住嗰區啲人唔多，暫時都未有確診個案，唔及歐美咁緊張。」

何婉盈接受倪詩蓓的訪問中，大爆當年跟男朋友性格不合而分手，卻意外懷孕，何婉盈說︰「我當時已經係高齡產婦，就算再有機會懷孕亦都唔想，所以雙方都決定再嘗試一齊生活。對方都想結婚，但我唔想，因為我28歲時結過婚，29歲就離婚，呢件事對我好大陰影，聽到結婚呢兩個字都有恐懼。後來到囡囡2歲，感覺雙方都唔係好合適，所以最終決定分開。」何婉盈說當時在馬會打工月薪3-4萬元，但扣除屋租、生活費後所剩無幾，故決定返大陸唱歌︰「我覺得對囡囡唔住，喺佢細細個嘅時候成日陪唔到佢，又要返工，又要返內地唱歌，我覺得欠咗佢，所以佢要乜我都買畀佢。雖然係咁，但我覺得身教好重要，我要教好囡囡價值觀，依家囡囡12-13歲就開始教佢理財，囡囡都有見佢爸爸，佢爸爸亦都已經有另一個家庭，所以囡囡亦有個同父異母嘅弟弟。我無阻止佢哋見面，教佢哋要相親相愛，希望成為一個Happy girl去成長。」