【首屈一指】蔡卓妍幫Kenny染髮驚變大師級

身在吉隆坡拍攝網劇嘅藝人蔡卓妍（阿Sa）同關智斌（Kenny）因疫情關係，早前收到劇組通知要即時轉去下一個拍攝地，搞到嗱嗱臨執包袱要走人，現時安頓好嘅佢，暫時又未有工開，Kenny呢日喺社交網表示，邀請阿Sa幫自己染頭髮，阿Sa繼之前幫助手剪頭髮之後，染頭髮對佢嚟講完全冇難度，兩三下手勢就幫Kenny染好頭髮，難怪Kenny都要封對方做「KimrobinSA」：「#滯留營Day 4日常，有幸遇到髮型界首屈一指大師#kimrobinSA 親自操刀！#由白變黑又得#得咗#頭頂有角」而阿Sa亦留言指相當滿意自己嘅作品：「距離成為一個出色嘅髮型師又邁進了一大步。」