《愛.回家》風少有得回家了!咁佢哋呢?

20200322
東網電視
更多新聞短片
佢哋有冇歸期?
無綫處境劇《愛.回家之開心速遞》過去有唔少角色要「離家出走」,而消失咗2年半嘅「風少」陳浚霆突然回家,令唔少劇迷都好開心,亦不禁令人想起「佢哋」!
「博士」馬貫東
喺風少回家前,拍足2年嘅「博士」馬貫東喺2019年頭突然要離開劇組,當時好多網民都唔捨得!相隔一年,佢終於返咗屋企喇,劇情講到佢單拖由英國返港,性情大變,又唔肯多提女友「Mandy」謝芷倫,原來只係返港接同事嘅妻兒去英國。而佢亦只係拍得一集咁多,之後冇再出現,究竟係點呢?
「Mandy」謝芷倫
即使當時曾傳過Mandy會一齊回家,但似乎Mandy未有回家迹象!雖然回歸無期,但佢同「屋企人」都保持聯絡,飯敍都見到佢!而佢都繼續拍劇,好似之前嘅《大醬園》、《解決師》、《牛下女高音》、新劇《堅離地愛堅離地》等,仲有熱播中嘅《法證先鋒IV》,如今仲係無綫「親生女」,話唔定好快有好消息呢!
「垃圾清」周梓盈
原本同「Terry」李偉健飾演一對嘅「垃圾清」周梓盈,喺2019年12月31日突然喺網上宣布離開TVB,話因為合約問題要離巢,同Terry感情無疾而終!喺劇中嘅佢反應遲鈍又蠢,成日無意寸「大小姐」林淑敏,角色設定勁討好!如今回復自由身嘅佢,成2個月冇更新社交網,唔少網民都問佢近況如何呀!
「朱天梯」梁証嘉
另一條同樣冇咗下文嘅感情線就係「朱天梯」梁証嘉同「熊心如」蘇韻姿!劇情講到朱天梯拒絕咗熊心如嘅表白後,去咗英國打官司,之後就冇再出現,消失咗2個月。連佢都唔清楚安排,未知歸期,但直言好想快啲重返劇組,好想知同心如嘅發展係點咁話!
「傻強」馮奕森
不過「被消失」得最突然嘅應該就係「傻強」馮奕森 !現實中嘅佢一啲都唔傻,仲靚仔有型,喺劇中放低偶像包袱演出,同朱凌凌、安仔、阿壯組成嘅「安凌強壯」深得民心,戲份甚多,但劇情就突然交代佢去西伯利亞留學,之後冇再出現!有傳係因為客串迷你劇《心冤 》而被無綫雪藏,Foul出劇組,不過佢就話公司對佢好好。雖然未知會否再參與嘅《愛.回家》,但就有拍電影,不過自1月31日冇再更新社交網,網民都留言話好掛住佢呀!