疫境入場捧愛駒跑第八　城城冇事精神離場

新冠肺炎肆虐，好多明星都唔出街免受感染，但郭富城今晚現身馬跑場馬場，為第六場出賽嘅愛駒「舞士精神」打氣，至於愛妻方媛就唔見喺身邊，馬會行政總裁應家柏發現貴客出現立即上前打招呼，兩個大人物都做足防疫措施戴晒口罩，為咗避免感染二人來個撞手禮（手肘撞手肘），可能有好多料要爆，應家柏主動趨前近距離密斟咗幾句，城城眼神即時露出殺氣，信心突然爆晒棚。

咁啱三屆香港冠軍練馬師方嘉柏（小方）經過，向城城匯報「舞士精神」最近嘅表現，如果三連勝的話，城城有頭馬相影唔使白行一趟。

話音未落12隻駿馬脫閘而出，馬主城城、馬會CEO同練馬師小方喺看台睇得好緊張，2.1倍大熱嘅「舞士精神」跑第八，看來城城有啲失望，不過「冇事」，好精神咁消失在人群中。