韓毓霞目擊蝦碌時刻!即睇奧運經典場面

2020年03月25日 22:30
東網電視
更多新聞短片
奧運延期,不如睇吓啲花邊嘢笑吓啦!
2020東京奧運因為疫情而延至2021年,而最近為無綫主持7屆奧運嘅韓毓霞都離巢,不禁令人回想過去嘅「精彩」時刻呀!
2008年北京奧運時,畫面突然切換到北京鳥巢場館,當時喺直播室嘅鄭裕玲(嘟嘟)大聲向工作人員話:「樓下你係咪仲要大聲過我哋呀!」而身旁嘅韓毓霞及李克勤就喺度整理衣服,蝦碌鏡頭出晒街!事後克勤力撐嘟嘟唔係鬧人,因為場館真係好嘈,所以講嘢要好大聲啫!之後喺直播開幕式時,於完場後歌星演唱時,嘟嘟試咪講「1234,1234,冇出街嘅呢啲可?」被播咗出街,聽到觀眾一頭問號!
講到奧運又怎能夠沒有陳百祥(阿叻)呢?喺同年主持籃球比賽直播時,曾講出一句:「點解Kobe Bryant進攻咁勁,點解仲要打Guard?」以為後衞只負責防守,事後被批評對籃球認知不足,阿叻就解釋係「明知故犯」,事前連一頁奧運資料都冇睇過!而喺2016年巴西里約熱內盧奧運,阿叻成為唯一代表香港嘅火炬手引起爭議,被網民質疑冇資格!
唔少港姐都會獲委派重任做主持,好似楊婉儀、張嘉兒咁,前者就曾講錯:「嘩!中國已經20面金牌啦!」即時被金牌體育主持潘宗明糾正:「係20面獎牌!」而後者見到郭晶晶跳水冇水花時,竟講成「冇火花」!
不過講到最經典一定係葉璇同方力申啦,2004年雅典奧運時,為無綫擔任主持嘅兩人喺鏡頭前爭執,方力申因為被葉璇搶對白兼打斷話柄,對佢講咗句:「跟住你寸我吖嘛!」點知全部播晒出街,而直播室主持人就即時調停,兩人發現後一面尷尬!而坐喺旁邊直擊一切嘅韓毓霞就冇咁好氣,隨時處於作戰狀態!如今韓毓霞離開無綫,網民都話下屆冇咗佢都唔知點算喇!