落場做醫護　吳千語幫老友拆線

聞「炎」色變，唔少市民不單止少出外食飯睇戲，就連去診所或醫院睇醫生，都可免則免，驚隨時冇事變出事！女星吳千語為咗幫朋友，就無端端做埋醫護人員嗰份，落手落腳拆線！

吳千語喺社交網晒一段短片，只係見到成班朋友「群聚」圍埋一齊，佢仲叫網民估吓佢做乜，又畀晒貼士話同剪嘢有關。之後佢終於開估，原來佢係幫一位朋友喺頭部嘅傷口拆線，其他朋友就分工合作，包括用手提電話開電筒照等等。佢留言：「話說有人把頭撞破了，兩個禮拜後想把傷口的線拆了，但Whistler（加拿大惠斯勒）的醫院看診太貴，於是我們決定自己拆。」、「第一次手術順利完成，特別鳴謝我的團隊，拔線，照明和攝影。」

雖然義氣搭夠，但好多網民質疑，如果冇受專業訓練，加上如果較剪等工具冇消毒嘅話，真係會好大件事，分分鐘搞到流血或者傷口發炎，隨時手尾長，仲貴過原先去醫院拆線！