梁詠琪生日匿屋企玩Live　囡囡靚樣搶晒鏡

歌手梁詠琪（GiGi）3月25日踏入44歲生日，佢特登開live唱歌同粉絲齊齊過生日。佢一開始同粉絲打招呼，坦言因為疫情關係冇心情慶祝生日，所以希望同大家做live。佢又話今日冇band，因為避免同大家近距離接觸，所以One Man Band上陣，笑言自己喺屋企打咗成日燈，又自己梳頭，準備咗成日。之後佢唱出幾首歌，包括《畫出彩虹》、《再見灰姑娘》等，期間囡囡Sofia喺門口係咁搞搞震叫佢，Gigi終於忍唔住叫佢入嚟，囡囡幾度「亂入」鏡頭一秒，十分可愛，Gigi笑言因為冇得鎖門，所以阻唔到囡囡入嚟。

而唱歌時Gigi拎住好大個咪唱歌，有粉絲講笑話似「湯壺」，而其他粉絲就大讚佢靚女、唱歌好聽，又同佢講生日快樂。Gigi又分享最近嘅生活，例如整下麵包、蛋糕，而做最多就係同囡囡上網做功課。佢又坦言今年生日冇特別慶祝，同屋企人食飯就算，亦謂日日都有睇新聞，希望疫情快啲過，大家身體健康，可以回復正常生活，笑言希望自己開到正常concert。期間Gigi更預先唱出幾句新歌畀大家聽，又滿足粉絲嘅點唱，最後Sofia又出場，兩人同大家講bye bye。