3個花旦晒自拍 32歲劉亦菲玩濾鏡減齡10年

2020年03月26日 10:30
東網電視
更多新聞短片
劉亦菲張相都尚算自然。
疫情幾乎癱瘓內地演藝界,多位花旦雖然困喺屋企等工開,但都要喺微博放吓相,keep番啲人氣,啲網友仲發現八十後同九十後嘅女星,晒張相都零舍唔同!好似本來有新戲《花木蘭》全球上映、但撞正新冠肺炎影響映期嘅內地女星劉亦菲,好彩都可以出席個首映禮攞番個頭威,佢都好勤力,喺微博放張加咗濾鏡效果嘅素顏相搞吓話題,放咗冇五個鐘,已經吸like超過5萬!雖然劉亦菲已經32歲,不過個濾鏡真係幫咗佢,即係幫佢「減齡」,網友話成個22歲咁樣!
至於同劉亦菲都係八十後、31歲嘅馬思純,啲獨照就冇玩特別效果,只係好隨意咁除咗對鞋騷對小白襪,露吓膝頭就算,乜花巧都冇,不過依然都有網民狂讚,猛話佢膝頭好白好滑好正喎!咁都得?佢仲巴閉到,喺呢個疫情下有工開,佢留言:「收工啦!準備在家鍛個煉,來個火鍋!」仲打邊爐?
後浪推前浪,九十後代表、22歲嘅關曉彤,玩單手自拍一定迅速純熟,係咁易個頭揈兩吓,就有幾張靚相,仲高手到連個尖下巴都影埋出嚟,佢話:「是瘦了二両的自拍。」網民話相比劉亦菲同馬思純,當然係自拍高手,青春無敵咁話!