疫情爆發前！蔣嘉瑩成家遊泰　阿仔勁大膽

新冠肺炎影響下，好多國家都實施不同入境限制措施，歌手蔣嘉瑩（Vivian）明白暫時好難出埠旅行，早在疫情未爆發前一家三口就到泰國布吉旅行。

Vivian表示以往只要學校放假都會同老公一齊帶兒子去不同地方旅行，希望他能放眼世界，今次揀布吉島主要不想去太遠地方：「玩幾日就算，Marvis好鍾意沙灘同燒烤，我哋又有朋友住布吉島，可以順道探望朋友。喺布吉日日都係陽光與海灘，因為回港後我要開工影靚相，隨身帶住太陽油，每隔幾小時就由臉到腳趾都塗滿太陽油驚曬黑。」

今次行程Marvis玩得最開心，例如近距離同老虎拍照，又到大象保護區參觀幫大象沖涼，最厲害是只得5歲的Marvis跟老虎合照時完全唔驚，Vivian笑言：「完全估唔到我個仔係咁大膽，同老虎影相一啲都唔驚，我哋去睇海豚，佢同海豚影相亦完全唔怕，參觀大象時知道可以幫大象沖涼，佢仲一支箭標去幫大象沖涼，似係隻好大嘅象，唔係BB象喎，佢真係膽大過大人。」