羅仲謙教洪永城造人秘訣　就係要有…

藝人羅仲謙（謙仔）和洪永城為無綫劇集《陀槍師姐2020》開工，提到謙仔老婆楊怡有喜，問洪永城可有感染到謙仔將為人父的喜悅？他說：「梗係有，謙仔好開心，又間唔中分享屋企嘢畀我聽，的確感染我覺得有咁幸福家庭，係好開心嘅事。（你係咪都快？）有好消息同大家講。」洪永城又抵死幫記者問謙仔，可有造人秘訣？謙仔說：「造人秘訣你叻過我，我都係初哥，真係好彩，最緊要放鬆。」洪永城就謂謙仔有給他提示，就是要有強健體魄：「佢成日講做Gym、做運動，個胸點勁啲，已經係個好提示㗎啦。」謙仔說：「加埋好氣氛就OK！」

謙仔謂現時在家操練，因劇中會有赤膊戲，例如浸桑拿，洪永城即笑言叫他不好再練：「你唔好咁勁好唔好，你個波已經好大，你咁勁搞到我好似好弱咁。」謙仔又謂現時有40幾吋胸肌，期間洪永城摸其胸肌，謙仔即嗌「抽水」：「你唔好咁多手啦，陣間啲人又傳你㗎啦！」

講到與朱晨麗（朱朱）合作爆出「鹹豬嘴」疑雲，問到洪永城此劇可有親熱戲？他說：「呢套唔係咁多。（所以可以安心啲？）可能係嘅。（件事影響心情？）影響已經過咗，所以盡量唔諗呢件事、唔討論，冇回應。（有通知《多功能老婆》會開續集？）冇聽到呢個消息，都係傳，未確定，一切交畀公司安排。（如果公司安排你同朱朱再拍介唔介意？）要做都要做啦。」

在旁謙仔似乎一直「食花生」，問到識兩人的他可會幫手做和事老？他扮不知情說：「發生咩事？（話兩人不和？）我冇聽聞喎。總之兩個都咁有價值，公司唔會放過嘅。」期間謙仔又再抵死抽水笑洪永城：「你加戲前問過我先喎！」洪永城即坦言：「其實拍劇加加減減係好正常，調整吓。」