【疑被Out】《慶餘年》班底合體獨欠肖戰

2020年04月05日 11:57
東網電視
更多新聞短片
唔係嘛,靚仔都冇得留低?
內地古裝劇《慶餘年》依家晚晚播,迷到一班師奶粉絲𠵱嘩鬼叫,一早網上煲晒全劇嘅網友都知,去到最後大直路,「范閑」張若昀將被「言冰雲」肖戰一劍刺中倒地,並為第二季埋下伏筆。
因應疫情,續集將會在今年年底左右先正式開拍,而第二季劇本大綱出爐,當中好多細節都要調整,不過聽日(6日)張若昀就會帶領劇中四大美女李沁、宋軼、辛芷蕾、李純加埋「范思轍」郭麒麟,錄製大陸節目《王牌對王牌》,未開拍先合體,為續集造定勢。
除劇本問題,大家最關心都係原班底能否順利演出,畢竟一直有傳成員無法齊聚,而今次出席節目嘅來賓,基本上都確認會出演第二季,不過大家睇睇吓又覺得唔對路,因為主要演員兼人氣流量嘅肖戰竟然唔見影,雖然肖戰飾演嘅言冰雲去到後期先出現,但絲毫冇耽誤佢嘅人氣,更有好多人係因為肖戰已煲晒成套《慶餘年》添,搞到有網友就擔心唔知續集係咪會飛走肖戰,驚冇得再見到偶像出鏡!