無綫開拍《七公主》 新舊女神都上榜

20200406
東網電視
更多新聞短片
今次女神傾巢而出,仲唔箍到班宅男晚晚煲劇!
無綫五月將會開拍新劇《七公主》(暫名),而「七公主」的名單亦首度曝光,貴為無綫「七公主」,當然全都是力捧兼有實力的人,她們就是黃翠如、林夏薇、高海寧、江嘉敏、劉佩玥、鄺潔楹及陳曉華,既有實力派,又有可索性高的小花,而宅男女神陳瀅亦會為此劇客串。不過「公主」唔一定配「王子」,此劇冇「王子」,只得三位實力演員徐榮、鄭子誠及陸永任「公主」選擇。
據知,今次劇中角色都是為主角們度身訂造,很多更是她們未演過的,翠如會飾演一名律師,她接受訪問時謂:「今次呢個角色好有挑戰,我都好多謝監製,上年年中佢已經話會搵我拍劇,我都好期待,而呢個律師係一個好叻、好狠嘅律師,唔同平時好Soft嘅我,而且當中有好多法庭嘢,要好準確,所以最近我都不停咁睇好多電影、電視劇,好似英國同無綫嘅法律劇,本身我都好想試吓去法院旁聽,但係最近唔可以啦,會遲啲先去,依家有少少劇本,都分析緊角色同睇吓點演。」說到劇中多女仔,翠如謂:「其實我未同過高Ling同夏薇合作,而劇入面我哋三個嘅性格都好唔同·所以出嚟應該幾得意。」翠如被問到三位男演員中會揀誰與她做一對時,她謂:「其實呢三位男演員我都未一齊拍過劇,不過如果畀我揀,我梗係揀陸永啦!我直頭當佢係屋企人咁,如果變成情侶都幾得意,希望有一日我可以同佢拍感情戲,應該好史詩式!」
而高海寧今次劇中的角色都相當特別,她飾演一名性格Man爆又豪邁的司機,相當破格。高Ling受訪時說:「個角色好麻甩,我會剪短頭髪,比以往更短。(使唔使紮胸上陣?)盡紮啦!可能我到時會着啲鬆身衫,依家都練緊擘大對腳坐,講嘢把聲又粗啲、語氣低啲咁,我都問始讀緊劇本,啲對白都好倔。」問到拍女人劇會否怕多是非時?她謂:「呢個我又一啲都唔擔心喎!本身我個人好易相處,唔擔心,同埋江嘉敏、陳曉華我都合作過,翠如、薇薇又識。」她又表示劇中自己身邊好多男仔團團轉,她謂:「其實我同鄭子誠合作過幾次,感情戲喺《愛情食物鏈》都試過,陸永喺《婚姻合伙人》就做過我細佬,相反徐榮我未合作過,如果畀我揀,我想揀佢,可能會有新火花。」
而林夏薇受訪時指劇中自己是一個共享空間的經理,她坦言:「今次的角色好吸引到我,是之前未試過,情緒起伏好大,對我嚟講係大挑戰,希望突破自己。今次同翠如都係第一次合作,高Ling就繼《單戀雙城》後到依家先再合作。(怕唔怕女人戲是非多?)開工都係做好自己本分工作,So far咁多年我開工都冇是非,因為我一開劇就會喺角色世界入面,好難有是非!」問到三位男士最想選擇誰做一對時,薇薇謂:「其實我最熟嘅係徐榮,因為之前ー齊去澳門拍《乘勝狙擊》,戲份都多,所以大家熟啲。」