東方日報C1:胡美貽月嘔50萬撐3舖壓力爆煲

2020年04月09日 03:03
東網電視
更多新聞短片
「咪神」胡美貽生意非常慘淡,單是租金每月已「硬食」50萬。
新冠肺炎疫情尚未減退,各行各業均陷困境,擁有三間榴槤甜品店的無綫新進「咪神」胡美貽生意亦非常慘淡,單是租金每月已「硬食」50萬,加上近月幾乎零工作,幾重打擊下暴瘦17磅,連月事亦受影響,一度要求助心理醫生, 雖然父母力勸她返回美國休養, 但她深信會捱得過疫情,每日親自睇舖12粒鐘亦在所不計。
擁34D上圍的胡美貽(Nicole)在無綫節目《3日2夜》彈起,被捧為新一代「咪神」,早前於《法證先鋒IV》中,收起身材扮「死屍」任人解剖,獲得不少網友讚賞夠專業。而從美國回流的她,加入娛樂圈同時,年前更踩過界大搞榴槤甜品生意,連開三間分店,雖然期間遇上社會運動,亦頂得住未有蝕本,她最始料不及是疫情愈見嚴重,之前賺落已開始嘔凸,三間舖租金連燈油火蠟、人工,每月開支最少要50萬元。
落舖頭做阿四
其實早於疫情初期,Nicole已將尖沙咀舖位的樓上堂食區關閉,只餘下底層做外賣,同時削減一半人手。她說:「最大支出係尖沙咀,因為地方大,舖租亦相應提高,依家又冇遊客,主要做附近街坊生意,生意跌咗幾多成,真係唔想提,總之好心傷。」至於天后與元朗店一早預了做外賣,店舖租金不算太貴,但冇生意一樣唔掂。
為減省開支,她親自落場幫忙分擔職員工作。不過,即使左慳右慳,再掏出自己的積蓄,也只能捱幾個月,大抵疫情未見曙光,她十分擔心生意前景,但又不敢向遠在美國的父母訴苦,搞到食唔安坐唔樂,一日只食得一餐,結果短時間內令體重急跌17磅,不但如此,就連生理周期也搞到亂晒龍,再加上情緒起伏,據知她一度要看心理醫生,認真我見猶憐!
日前Nicole單拖到位於天后的榴槤舖打躉,坐足成粒鐘的她眼見零客人,即戴上膠手套搬貨,又到凍櫃整理榴槤及手調珍珠奶茶,及後拿起消毒噴霧在舖內起勢四圍抹,期間既擒高又踎低。
生理期更加亂
對於生意大減,Nicole表現無奈:「都冇計,呢個疫情之下一定差,頂得就頂啦!(瘦咗咁多?)因為冇乜工開,生意又咁樣都真係擔心,生理期我不嬲唔準,呢排就更加亂!(睇心理醫生?)都係去諮詢一下,醫生都叫我放鬆心情,唔好諗咁多,媽咪本身係中醫,都有睇住我嘅情況。(有冇叫父母喺生意上幫手?)佢哋當初畀完第一筆錢我做生意之後,已經講明有咩事都唔會出手,所以我冇同佢哋講,之前父母係有叫我返美國住吓,但依家嗰邊疫情咁勁,都唔知點,最後覺得留喺香港安全啲!希望疫情快啲過,所有嘢回復番以前咁。」
更多新聞,請瀏覽東方日報網頁: