甄澤權玩魔術玩上網　Bob一條龍服務

面對新冠肺炎疫情，魔術師甄澤權（Louis）想出將魔術網絡化，近日就推出網上魔術課程，還找來好友林盛斌（Bob）客串當顧問，合組「新兄弟幫」！

Louis笑說：「因為之前成日周圍飛，呢排多咗時間留喺屋企諗啲新方向，真係好多朋友叫我網上教魔術，保持正能量，我都覺得可以一試。」

對於Bob做顧問，Louis稱讚好友是食腦一族：「佢成日幫朋友諗主意，又好有生意頭腦，我之前出過魔術手錶，依家又計劃出啤牌，咁佢公司又有製作啤牌服務，可以一條龍合作。」