樂做「家庭主夫」!羅力威養到雨僑變公主

2020年04月11日 22:51
東網電視
更多新聞短片
羅力威唔只做晒家務,連煮飯都負責埋!
歌手羅力威現時變身「家庭主夫」,全天候服侍懷孕太太雨僑,不讓她操勞,打理家頭細務對他來說易如反掌,只是買餸煮飯還在學習階段,絕對是廿四孝老公!
最煩係狂洗手
將榮升人父的羅力威接受專訪,他透露現時主理所有家頭細務,並貼身照顧太太雨僑,不但洗衫、吸塵、抹地、洗碗,最近更買餸、煮飯、煲湯:「自己仲係初哥,好多時係邊買邊煮邊問,好多時分量都係撞,有時好食,有時麻麻哋,但因為想屋企健康啲,所以呢幾個月係咁。(太太變公主?)盡量做到乜咪做,我以前食佢煮嘅嘢多,佢煮嘢好好味,我自己唔煮都唔知啲嘢咁難煮!一煮飯最煩係要洗好多次手,好彩未洗到手爛。」他亦樂於做「家庭主夫」:「係煮飯要買餸同多啲洗手煩,洗碗、抹地、吸塵、洗衫,一日加埋都唔係用好多時間。」
老婆話晒事
兩人拍拖七年、結婚兩年,相愛近十年可有愛情保鮮秘訣?阿威坦言:「真係冇乜秘訣,咁多年唔需要花巧,相處係愛一個人就會為佢做咩都得。」又指由太太話事做主導:「你當我淨係識出力,例如去旅行,我可以大力拎晒啲嘢,但度行程各樣嘢就係佢負責,佢主導、我執行。(佢話事多啲?)佢話事當然冇問題,正如每餐飯我食乜都冇問題,佢食乜我就食乜。」
轉飲紅酒
工作方面,阿威最近推出新歌《仙水》,講述人生遇到困難,有不同方法找到情緒發洩的出口。問可會飲酒紓壓?他說:「我係鍾意喺大牌檔飲吓啤酒,其實以前鍾意飲白酒,但飲飲吓跟咗太太飲紅酒,以前我會飲多啲,一路飲一路彈琴創作,但同阿僑一齊咗之後,兩人生活就唔係咁,依家就冇乜飲啦,可能夏天先飲吓啤酒吓火!」
場地:英皇駿景酒店