操Fit唔剝衫！鄭俊弘嗌怕醜留演唱會先露

鄭俊弘（Fred）日前為劇集《機場特警》主題曲《血淚的磨練》拍攝MV，歌詞講述要實現理想就必需經過考驗與磨練，並歷盡血和淚的過程，或者會令眼前的路變得模糊，但只有衝得過這難關的人才可以完成目標。

Fred謂：「首歌都係想表達要有堅定嘅信念，自己唱過好多呢種有節奏嘅歌曲，原來作曲人張家誠點名話呢類有拍子又充滿活力嘅歌曲好適合我唱，覺得好充滿正能量，好開心佢滿意我嘅演繹方式。」

導演知道Fred好鍾意做運動，就取材在健身室拍攝，要拍出一種艱辛鍛煉的感覺，而最大的對手就是要打倒自己的心魔。拍攝時Fred完全認真投入去做健身，且好熟悉各種器材的操作方法，他說：「其實最近忙於拍新劇，已經少咗時間去做運動，今次就乘機操下，拍MV完全好似做完一日健身，好攰。」

導演本來想為一眾粉絲謀福利，要求Fred在MV中，赤裸上身展示大隻的身材，Fred怕羞拒絕：「就算係男人，都唔可以隨便亂除衫，梗係留番演唱會，或者有更重要嘅工作再講，而且事前要有充足時間去操練到滿意先可以。」