莊思敏日日宅在家　同台灣老公冇偈傾

藝人莊思敏到電台受訪，表示帶備抗疫用品來送給聽眾。問到她怎樣抗疫？她笑言除了開工，就是宅在家：「不停會買嘢布置屋企，同埋會不停online shopping，成個生活模式改變咗，同朋友話題都變咗煲劇，又會多咗視像通話，我之前抗拒視像通話嘅。」講到老公現身在台灣，她坦言有兩星期沒見對方，惟有視像通話：「都掛住佢，但冇辦法，未知幾時先見得。」

問到老公可是每日都報到幾次？她笑言：「我哋每日聯絡都多過三次，keep住message，不過開始都幾冇話題，因為成日留喺屋企冇得出街，依家都係講吓每日食乜同煲緊咩劇，問對方做緊咩都係攤喺張床度。」她又謂父母身處馬來西亞，因為當地戒嚴，所以不能出去，而另一妹妹莊思華亦在馬來西亞，笑言妹妹不能出街很慘：「因為佢以前有好多聚會，但依家冇得出街，所以就學識喺屋企視像隔空飲酒同猜枚。（你有冇試過？）都有玩過，但我唔enjoy呢件事。」