拍戲搵命博　郭富城懷疑自己瀨嘢患絕症

由影帝郭富城主演的電影《麥路人》因疫情關係延期上映，呢日佢同導演黃慶勳齊齊做fb直播講吓套戲，喺拍完呢套戲時，佢因為太過入戲搞到自己以為同角色一樣患咗絕症！

呢次係城城第一次做fb直播，喺分享拍攝難忘事時，佢話因為角色人設係煙不離手，只要一有錢就要去買煙，所以套戲入面見到城城煙不離手，期間食到咳唔停，工作人員勁擔心仲提意佢去睇中醫執劑藥食吓，角色最終患上絕症：「拍完之後我成日覺得自己唔舒服，以為自己瀨咗嘢都係患絕症，好擔心之下去咗睇醫生做身體檢查，報告出嚟醫生話我身體好好先至安心晒。」

好戲之人鮑起靜於戲中飾演城城的母親，說到兩人的母子情，即令城城有所感觸，憶起了亡母，忍不住哽咽起來表示：「個角色真係令我感受好深，因為媽媽啱啱唔係度。」

隨時演員變導演

問到他對以後拍戲的想法，城城透露自己五、六前曾喺去廁所時諗到一條好橋，更加搵咗人寫個古仔出嚟，隨時有機會由演員變成導演：「我嘅性格係雞蛋裏挑骨頭，做導演我諗我會個景唔啱或者狀態唔好又唔拍住，都唔知要拍幾耐先拍完，做導演同演員會令我分心，依家都係做多陣演員沉澱下，之後可能會做導演。」

在訪問接近尾聲，城城都有談到近況，指自己最近都是留在家中照顧兩位女兒，四月細女二寶一歲生日，但因疫情嘅關係，只買蛋糕低調在家慶祝。城城還指最近的三個月都在家食住家飯，破了他的人生記錄，城城還感謝外父下廚做「煮飯公」，並忽發奇想笑言自己要挑戰廚師角色，因他完全不懂煮飯。