何超蓮爆前男友偷食 竇驍晒蜜照派定心丸

2020年04月29日 07:47
東網電視
更多新聞短片
恩愛到暈~
內地網紅周揚青大爆前男友台灣舞王羅志祥渣男荒淫行為,唔少人都戥佢唔抵,仲話佢浪費咗最寶貴嘅9年青春喺小豬身上,佢好姊妹何超蓮亦都有公開留言力撐,仲話好明白周揚青嘅心情,因為佢都經歷過畀前男友劈腿嘅傷痛,好多網民都估呢位出軌男就係同佢拍拖4年嘅台灣歌手吳克羣!
不過呢啲都係過去式,因為超蓮依家已經有新男友內地男星竇驍,而呢一日就係佢哋拍拖公開戀情一周年,將戀情低調處理嘅竇驍一反常態,喺凌晨連出17張相放閃晒恩愛,除咗一啲戀人之間嘅搞笑相之外,仲有超蓮嘅水着相放送,見佢着住紅色一件頭泳衣挨喺船邊感受海風,一臉悠然自得,場面似足寫真相一樣,見女友影得咁開心,貪玩嘅竇驍都要伸個頭入鏡影埋一份!
之前佢哋去旅行嘅私密相都有公開,佢哋行沙灘看海兼頭貼頭歎燭光晚餐浪漫到暈,超蓮仲盛裝上陣暗晒佢嘅好身材。網民睇完啲相都話畀佢哋閃到盲,仲有人推測竇驍喺超蓮公開自己拍拖嘅慘痛經歷之後變得咁高調,似乎係想派定心丸畀超蓮﹐等女友唔會再諗起以前同吳克羣拍拖要收收埋埋嘅境況,等佢哋嘅戀情可以光明正大下得到大家嘅祝福。