《極限挑戰》官宣新名單　正式除名羅志祥

台灣舞王羅志祥（小豬）同周揚青分手爆醜聞，小豬一次失足，拖累自己被飛出內地節目《創造營2020》、《極限挑戰》等，之前就有指《創造營2020》嘅導師班底被內地男星吳亦凡取代，而今日《極限挑戰》第六季都官宣新主持名單，小豬今次正式要同節目Say Goodbye喇！

《極限挑戰》微博今早終於官宣，除舊有成員王迅、張藝興、雷佳音、岳雲鵬、迪麗熱巴外，新節目一口氣加入3位新成員，包括係郭京飛、賈乃亮及鄧倫。而今次官宣方式都好特別，官方微博直接晒出成員「Group Chat」內容，唔少網友都力撐新加入成員，紛紛留言話好期待節目出街。