蔡思貝撻着胡鴻鈞感酸溜溜?余德丞咁樣講

20200502
東網電視
更多新聞短片
余德丞與蔡思貝傳緋聞多年,最近殺出個胡鴻鈞!
「陽光型男」余德丞(Dickson)與蔡思貝外形相襯,兩人傳足多時緋聞,但隨住女方被爆傳與胡鴻鈞撻着後,兩人緋聞已暫告一段落,對此他笑言三人是好朋友,之前都有一起食飯、睇演唱會,但沒有八卦兩人的感情事,問到可覺自己是兩人的煙幕?他笑言:「唔會啦,可能因為佢哋冇拍過節目啫,如果佢哋拍節目先,可能變咗我係小三都唔定,所以冇分煙唔煙幕。」而問到被思貝飛起可有酸溜溜的感覺?他笑言:「冇啦,點解會酸溜溜呀?都話兩個都係好朋友。(覺得佢哋襯唔襯?)我同佢襯啲,大把人都係咁講,我講同胡鴻鈞喎!(喺思貝手上搶胡鴻鈞過嚟?)如果我會做歌手,我會邀請佢同我合唱,蔡思貝唱歌唔得,我唱歌還可以。」
而提到Dickson主持的旅遊節目《台北101種玩法》近日播出,第二次主持旅遊節目的他希望做到搞笑貼地的風格,而今次亦會介紹一些較特別的景點,其中一個最難忘的經驗是上台北101大樓最頂層的暸望台:「我哋行埋出去睇台北全景,遺憾嗰日多雲有霧,睇得唔多,但有個奇景,就係當我準備行出去時,啲霧氣已經湧晒去樓梯度,好似置身於仙境。」今次除了拍攝外,問到可有乘機識女仔或有艷遇?他笑言很想有艷遇,自爆甚至特地走到連鎖百貨店,等待專門幫單身男女配對的網紅可會幫他配對:「點知兜咗3個圈佢都冇出現到。(好失望?)梗係失望啦!因為睇佢啲片配對啲人好正架嘛。(想識台妹?)做個朋友冇乜問題,下次去旅行佢可以帶你去玩,呢個係我目的,哈哈。」
講到台妹出名溫柔、樣靚、身材正,問到可符合其擇偶條件?他坦言較着重內在美:「最緊要係心地善良同性格好,要夾得埋,有共同話題可以溝通到,同埋我鍾意短頭髮嘅女仔,但冇話長頭髮唔得。」他亦覺得外國女生成長背景不同,價值觀可能會不同,並坦言接受不到異地戀:「咁遠咁辛苦,我之前中學試過,個女仔喺外國讀書,以前科技冇依家咁發達,所以都有少少可惜同遺憾。(自此唔想再試異地戀?)梗係啦,有陰影。」問到現時單身的他可恨拍拖?他笑言:「唔心急,如果緣分嚟咪嚟,唔嚟都冇所謂,依家都好開心,而且依家唔算好老,可能愈老愈有男人味。(媽咪有冇催你拍拖?)唔會啦,依家事業最緊要,冇事業都建立唔到家庭。」
場地:Tell Camellia
服裝:Equil from Lane Crawford