向籮霸致敬失敗　姜麗文變咗街霸角色

藝人姜麗文（Lesley）近日留在家中抗疫之餘，亦繼續做運動Keep住弗爆身材，呢日佢就大玩倒吊，爬上鋼管做出翻身動作，半天吊喺半空中，真係少啲體力都做唔到，佢仲自拍放上社交網同大家分享。

佢透露原來呢個動作，係向拉丁天后「籮霸」珍妮花露柏絲（Jennifer Lopez）致敬，扮緊對方早前喺《超級碗》表演時跳嘅鋼管舞，但見Lesley拍照時出盡力忍唔住咆哮大叫，連佢自己都笑指扮嘢失敗，變咗街霸中半獸人角色布蘭卡（Blanka），相當搞笑。