衛蘭留家抗疫肥咗　原來關阿妹事

歌手衛蘭出席網上音樂會錄影，表示會唱福音歌及講鼓勵說話，問到可是很久沒見大家？她說：「係呀，呢段時間都係留喺屋企，同忙新歌錄音，都好感恩忙。」問到在家抗疫可是食肥晒？她說：「有肥到啊，因為阿妹（衛詩）好鍾意整曲奇餅同蛋糕。（肥咗幾多？）冇數啊，但都有做運動。（阿妹有冇肥到？）佢本身都OK，好Fit。（佢整完唔食？）佢整完都會派畀鄰居食。」

提到母親節將到，她表示會致電身在韓國的媽咪：「因為飛唔到去，同埋諗住Order啲花送畀佢。（擔心嗰邊疫情？ ）都仲擔心，媽咪都係留喺屋企，同埋口罩都夠用。」

講到鍾欣潼驚爆離婚，她驚訝說：「係咩？都覺得好可惜，Keep住一段感情唔容易，要花好多心機。（佢哋閃婚所以易離婚？）聽過唔同Case，有啲識咗一段時間就結婚都仲係一齊緊，所以要睇Connection，同埋要睇想唔想維繫呢段感情。（你會唔會問候佢？）會Text佢。（講啲咩？繼續努力？）哈哈，我冇資格講，我都要繼續努力，如果佢唔開心我會叫佢祈禱。」