何雁詩再談心灰離星夢：我唔係最得寵！

歌手何雁詩接受電台訪問，現年28歲的她09年以16歲之齡參加第一屆《超級巨聲》入行，自從14年有機會出碟，15年轉投星夢唱片之後，她唱紅過不少洗腦式劇集主題曲。2020年，她選擇於1日1日宣布即將成為鄭俊弘太太，更選擇脫離星夢做自資獨立歌手，推出首支作品《致有夢想的人》。

節目中，她剖白與大台星夢不再續約因由：「我好感恩星夢讓我唱主題曲畀人認識我，但公司近年太多歌手，老闆（何哲圖）話要睇時間要排隊出歌，但我好希望一年出三首歌，我始終唔係最得寵嘅一個，我亦唔想爭做一姐。我好想進歩唔想停留，決定自資嘗試。」

鄭俊弘何雁詩二人的感情於2017年4月公開，最初承受不少負面新聞攻擊，何雁詩指二人去年年初有共識結婚，她說：「相對於之前嘅關係，我哋好少鬧交，或者經歷最初嘅辛苦，彼此都珍惜。到去年初，大家都會同朋友談起結婚，因為相處得好舒服好自然，如果呢個階段唔結婚，唔知點樣能令關係更進一步。」

她於節目中大爆鄭俊弘去年十一月於蘇梅島的驚喜求婚過程，她欣賞未婚夫事先問準她父母，但估不到父母突然現身當地，讓她驚喜交集：「佢跪下求婚，我係等咗一陣先say yes！事關我想享受嗰個moment長啲。之後父母突然出現，我就爆喊，不斷問：『點解？點解？』其實我好開心！」被問及父親最初於二人交往時，有否問及鄭俊弘過去的新聞？她指父親開明，與鄭俊弘早已很投契。至於二人年底結婚後會否立即計劃生下一代，她說：「會想過有下一代，但要遲幾年，因為啱啱先做獨立歌手，想喺歌唱事業再衝刺啲先，阿Fred都認同，我哋唯一唔會做嘅係雪卵，只想下一代健康同自然啲。」