古巨基激罕晒全家福　老婆生B後首現身

歌手古巨基（基仔）去年年底榮升人父，而太太Lorraine生B後一直未有露面。今日適逢母親節，基仔喺社交網上載一家三口全家福，古太更激罕現身，一臉慈母樣抱住囝囝Kuson，兩公婆笑容滿臉。

另一張相中，兩公婆趁Kuson瞓着，分別錫向BB兩邊面珠，相當溫馨。基仔並留言冧老婆：「成為了父親，更知道母親的偉大。今年是太太初為人母的第一個母親節，感謝太太的一切，願天下的兒女們都孝順父母。祝各位媽媽母親節快樂❤身體健康#我個仔心諗爸爸你下次錫我可唔可以剃鬚先呀 #有冇人同我一樣見到Kuson塊肥臉仔就忍唔住想輕輕搣吓佢呢 #真係每日都要搣吓㗎！」好友唐詩詠亦留言：「終於肯出鏡啦！」