被斥無良商人！蘇志威親自解畫

組合草蜢成員蘇志威（阿細）的跳舞學校iDance成立多年，辦得有聲有色，但學校昨日在官網張貼「課堂最新安排」通告，卻惹來自稱是學員的不滿，投訴學校聲稱為配合政府禁聚令措施，將課堂轉為7人的小班課堂，但如會員選擇參與7人的小班課堂將會扣除2個Credits（課堂），學員批評學校疑濫收費用，無理由要扣會員兩課堂，覺得這做法欠不公，有學員更鬧爆是搶錢行為：「好過分，唔應該轉介成本畀會員。」又斥阿細及拍檔韓馬利是無良商人。

阿細就東網的查問，他坦言理解學員嘅唔開心，所以他唔會嬲：「以我所知可能係誤會、政策上嘅改變，令到佢哋唔開心。」他詳細解釋最初誤以為政府禁聚令新措施，可以劃分幾區讓30幾人的課堂正常復課，所以就給學員在網上進行Booking登記，當他得知8人放寬禁聚令原來是以一個課室計算，他跟CEO傾過後，知道如果觸犯法例要坐監，他當然唔會犯法咁樣去博。

所以他們即時通知已在網上報名的學員，學校會將課堂錢全數退回，他說：「佢哋咁嬲，係覺得我畀錢你賺，但我都係做唔到，我都係被動，要跟番政府嘅禁聚令措施做法，但佢哋Book咗嗰兩個星期課堂，我退咗錢，佢哋係冇任何損失、影響，佢哋嘅會籍會延期14日，只係佢哋嘅期望冇咗。」

阿細跟拍檔曾經傾過，如果一個課室得7個學員咁樣開課，係蝕得好甘，據知學校因為疫情停業42日，損失慘重，已經蝕了400萬元，他說：「我哋有諗如果學員真係好想嚟上堂，咁畀一個Double價錢，佢哋畀多少少，我哋唔係唔使蝕，係蝕少咗，咁我哋咪照做，共同渡過，所以話我濫收費用，話我無良，喺呢個非常時期，如果佢哋想嚟係甘心自願，係我同佢嘅Deal，其他學員係冇損失嘅，我想問點解指摘我，我好想問我無良喺邊？我達唔到佢哋喺時間上嘅期望，我致歉，佢哋喺言語上發洩冇問題，我畀你發洩，但話我無良嘅請你攞出證據嚟。」

阿細表示學校由去年底開始，生意就唔係咁好，但公司一直有出糧畀員工、導師，他說：「我好想知我冇出糧畀邊個員工？依家啲人鍾意喺網上寫乜就寫乜，社會已經變得好奇怪，好想知邊個咁偉大、要佢哋幫邊個員工或導師喺網上向我追討，請你攞出證據嚟，如果冇嘅就唔好誣衊我，因為根本就冇存在，係佢哋自行幻想出嚟。」

趁住今日母親節，阿細與老婆劉小慧同埋女兒，一齊去食飯慶祝。