同何雁詩一樣？謝文欣自爆離開星夢真相

歌手謝文欣（Ally）加盟新唱片公司後，即刻推出新歌《偶像傳奇》，首次跟著名音樂監製伍樂城合作，她指錄音過程中獲益良多：「錄完第一次音，我係懷疑人生，唔知應唔應該做歌手，但佢好犀利，可以改變到我嘅唱腔，本身佢比喻我把聲係好似坐車咁Chok，Chok到後排乘客嘔咁，佢咁講完我就明點唱得連貫。（之前錄歌冇監製話過你同一問題？）曲風問題，呢首少女情懷啲，要輕聲唱，試過唱Live，係唱到死咗咁，所以都好大挑戰。」

講到Ally前同門歌手何雁詩，早前受訪時灰爆直言不是星夢最得寵歌手，所以決定離開，問到Ally是否因同一原因？她否認說：「我係滿約。（但你之前都有話被投閒置散。）機會唔多啫，有爭取，但都要睇命運。」並指轉新唱片公司心願是出更多歌，繼續保持愛音樂的初心：「洗濕咗個頭㗎啦！自己係以歌手身份入行，好鍾意唱歌，今年預計會出2、3首。（想出碟？）冇諗呢啲，呢刻係想要多啲歌。」