歌手蘇慧恩（Ophelia）帶同一歲大的愛貓白雪雪去到寵物影樓，為寵物比賽影參賽相，白雪雪更即場使出錫錫、High Five絕招，認真萌爆！Ophelia笑言準備了「母女裝」：「係水手服嚟，佢有個餅印獎，影完會叫人畀Like。其實白雪雪係蕊蕊嘅，佢轉贈畀我。」

她透露最近有拍寵物短片，希望可以訓練白雪雪成網紅：「原來好多人鍾意睇啲貓貓、狗狗片，所以都想試吓拍。（想做埋星媽？）哈哈！佢真係好鍾意影相，影100張有70張都望鏡頭，好有鏡頭觸覺。」

講到早前舉行的直播慈善音樂會，她表示共籌得接近2萬元，問會否開音樂會Part 2？她指更想開個人音樂會：「個騷已經延遲咗幾次，希望盡快開番。」